賴清德tī中國講台獨

賴清德tī中國講台獨

台灣南社 張復聚

1)  賴清德不過是講老實話niâ.

中國國民黨得著這个消息, 隨著chhiàng講「中華民國」才是台灣共識.

我看, 你beh tī台灣講「中華民國」才是台灣共識, 咱尊重你發言ê權利. M̄-kú請你mā-ài去中國上海大聲講出---來, 像賴清德按呢！tī台灣講「中華民國」,  真正是像tī便所內家己teh暗爽若定！但是tī中華文化霸權佔領下ê台灣, 講白賊是正常--ê, 所以咱ê政治人物有人ê名頭前有加頭銜「白賊」! 顛倒是, 講老實話犯著禁忌, 有罪. 

2）賴清德不過是講老實話niâ.

十幾年從有一个美國研究生問我台灣人ê政治立場, 伊研究ê題目是「語言kap政治」. 伊講tú訪問過林中斌先生(彼陣應該是國防部副部長). 林先生認為主張/支持台獨ê人無真濟.

我kā講：

研究生ài注意methodology. Tī台灣, 語言是足要緊ê方法. 若用英語問台灣人, 定著袂當有答案, 因為台灣人聽無! 但是若用華語/客語/原住民語/台語/問, 答案就真無仝. 台灣人對某種語言無好感, 無可能beh回答問題.

閣來, mā-ài看你按怎問問題.

你若去街仔路問人講「咱來hō͘中國統治, 好--無？」人定著kā你講”NO!”

你若去街仔路問人講「咱台灣來加入聯合國, 好--無？」人定著kā你講”Yes!”

咱kā這兩ê問題做伙思考, 表示啥物？

台灣人認定台灣是一个獨立ê國家, 無愛hō͘中國統治, 想beh加入聯合國！賴清德不過是講老實話niâ. 講老實話mā袂使得?

3）賴清德不過是講老實話niâ.

賴清德不過是kā台灣人政治立場用簡單ê話語, 清楚表達hō͘中國了解niâ.

不過, 賴清德猶是有犯著兩ê禁忌：

丹麥ê禁忌： 安徒生ê國王的新衣, 講出大家攏m̄敢講ê老實話

台灣ê禁忌：自228以來ê規矩「囡仔人有耳無喙」, 會使聽,袂使講, 賴市長講出喙.

所以, 本官認定賴市長有罪, 社會文化罪！

判徒刑8年：

……………

……………

……………

kā關入去台灣總統府！