二十五歲的阿兄 ~ 紀念於二二八革命犧牲的C君 ~

二十五歲的阿兄

~ 紀念於二二八革命犧牲的C君 ~

劉曜境

叫你一聲，二十五歲的阿兄。

你的青春，凋零在六十八年前，櫻花大開的時分。

阿山仔搜人的速度真緊，卡桑由咱大廳，追到路角的媽祖間。眼見你單薄赤足，未赴逃跑的身軀，被押進綠色的吉普，越駛越遠，消失在新店溪墘，淒冷的暗暝。

你離開了後，日誌繼續真歹過。穿中山裝的長官，不時來相找。

多桑賣豬仔賣金仔賣到下冬才會收成的稻米，只買回你打死無認最後變成埋葬許可的訊息。

讀冊臭彈會叛亂，真是世間尚好笑的代誌。四腳仔講你左翼反日清國奴，祖國講你陰謀煽動顛覆政府，惡性重大天地不容。

天啊無目，地啊無嘴，畫黑漆白攏隨伊歡喜。豬來狗去若搬戲，偏偏黑牢無命攏是阿兄你。

阿兄你不敢殺雞不敢剁肉不敢甲人大聲論長短，偏偏背骨硬氣牽拖咱大家。

阿妹仔兩次跟人講婚嫁，阿弟仔高考一次就及格，攏總為你名號起風波。

厝邊同鄉突然變生分，路過咱兜的門口，攏會繞道拐彎走到那邊去。

我二十五歲的阿兄喂，現在舊厝巷路一直翻。伊時咱做陣放牛的下厝，早就變成卡啦OK鶯鶯燕燕的場所。

你被押上豬仔吉普的路口，現在當做公所藏咱國旗的倉庫。阿陸仔過來灑錢買田起大樓，重劃區已經攏總來解放。每年給你作忌二二八，攏博無杯是為按怎？敢說找無返來的舊路？

你的面容越來越遙遠，夢中只剩模糊沒穿鞋仔的行跡。媽祖間猶原在路角，紅橙黃綠攏加持，黑白兩道全保庇。董事重選改朝換代，神恩浩瀚法力無邊，伊麻會伸手凍槍子。

咱兜算來也是媽祖的厝邊，伊敢有順便撫慰你胸坎中槍的孔嘴，普渡接引你找沒故鄉的身軀？