台灣南社探望a扁總統2013

台灣南社探望a扁總統2013

台灣南社

2013年3月29 , 多謝管碧玲立委安排. 韓明榮醫生(台灣南社社長) kap張復聚醫生(副社長)代表台灣南社 kap管媽做伙去台北榮總思源樓精神科病房探望咱a扁總統.

因為宜蘭縣民進黨立委陳歐珀當teh kā a扁總統面會, 阮佇外面等一睏á. 阮利用這段時間有kap榮總郭正典醫生(台灣醫社社長)討論a扁總統最近ê狀況, 了解總統病情, 真kā感謝! 閣, 正典兄敢佇榮總hia家己姑鳥長期替a扁出聲, hō͘阮足佩服! 郭醫師有講著a扁總統最近身體確實加真bái [不好],郭醫師逐日lóng有去kā看30分鐘, 進前beh走ê時a扁總統lóng會送伊到門口；毋過這站á, a扁總統若像無法度徛起來, 干焦坐佇椅仔kā郭醫師搧手感謝若定! 正典兄mā有提起美國神經病理學權威醫師周烒明診斷, 講a扁總統有帶著”常壓性水腦症”, 原因kap a扁總統進前佇台北監獄受24小時光線刺激, 擾亂睏眠節奏, 真有關係. 伊呼籲政府緊hō͘扁轉去厝治療.

Beh入去病房, 先愛經過2道警察檢查, 到門口愛kā ka-bang[手提包] kap手機á, camera留佇門口ê櫃á. 

a扁總統講話大舌足厲害---我,我,我,我,,,,,,.正手一直chhoah(tremor), 倒手正常; 記持猶算真好, 真濟代誌lóng講會真清楚; 無看伊行路, mā無講起小便ê問題; ; (探訪ê時間真無夠額) 毋過, 面色確實無好; 人足虛ê款式. 感覺鬥志猶有, 雖罔毋是真強;  管立委講彼工a扁總統ê精神狀況算真好, 永過ê情形毋是逐擺lóng按呢; 

a扁總統講ê重點有:

1) 法院無遵守”無罪推論 (presumption of innocence)”ê基本法治精神, 強押伊入監beh取口供;

2) 審判程序無照規矩 (due process of law), 凊彩變換法官, 使弄辜仲諒講白賊做偽證, 用這款不公不義ê方式來kā蹧躂kap侮辱, 伊足gêng-sim(凝心), hō͘伊心理自尊損斷無法度用言語表達!!! 這mā可能是伊今仔日頭腦病變ê基本因端之一!

3) 伊是做過總統ê人, 法院mā敢烏白kā審判, 烏白kā掠去關, 按呢一般普通台灣人ê人權beh哪有保障?

4) 關心台灣南社前社長鄭正煜ê健康, 對鄭社長長期teh推sak ê議題”教育台灣化”足認同, mā有佇第二任期內特別拜託教育部長杜正勝認真拍拚.

5) mā有特別感謝管立委一直lóng有teh走chông, 毋過因為lóng是’under table’, 外界khah 無看--著.

夫人吳淑珍mā抵好去佇hia, 氣色普通, 毋過足瘦, 阮毋敢問伊體重幾斤; 

坐佇輪椅, 不時用雙手hōaⁿ[緊握]輪椅桿á出力kā kha-chhng[屁股] theⁿh[撐]懸

應該是teh 做運動; 感覺猶是真想beh講話, 但是無機會講啥物話.

看著足毋甘.......

阮kā a扁總統kap夫人講, 這100%是政治迫害kap追殺! 若無, 為啥物4年外中國國民黨開ê法院 [許水德bat按呢講] 揣無證據thang明確kā定罪! 中國國民黨kā in掠去關, 實際上是關著你我所有ê台灣人, a扁總統不過是替台灣人揹十字架, 擔重擔, 咱大家lóng足不服, 足火大, 足tu̍h-lān; 阮送伊一本劉辰旦先生畫圖佇封面手指簿á [筆記本], 劉先生mā bat hō͘ 中國國民黨掠去關佇烏牢, 毋過伊講 “會當關我ê身軀, 袂當關我ê心靈”. 希望a扁總統mā保持這款心態.

早晚保重身體thang平安轉--來, 南部鄉親真思念a扁總統kap夫人, 有老大人猶擱戴扁帽, 希望in會緊轉來做伙食飯, 開講.

台灣南社認定: 徛佇人權, 醫療kap社會和諧ê立場來思考, 馬政府應該即時即刻無罪釋放a扁總統! 這對全台灣所有有人kap政黨lóng有正面ê影響!

PS: a扁總統病房現場koh有一個少年'監獄官', 生做小可緣投, 鼻á tok-tok, 應該無超過40歲, 毋是支那人, 卡成台灣kap西國lām ê "ai-no-ko (hybird)", 台語有夠老投, 伊一直teh記錄阮ê談話; (聽講mā有錄影, 我無注意.) beh離開ê時, 伊有kap阮握手, 我順彼ê機會kā khoe, "你聽過足濟故事hō͘ⁿ?" 伊歹勢歹勢應講 "hêⁿ-a, 逐工lóng teh聽...".

《本文已刊登於2013-4-4台灣守護周刊第64期》