第二次民主改革演講文稿

第二次民主改革演講文稿

台灣南社 張復聚

25 June 2014 左營

李前總統, 市長菊姊, 各位siân-pái, 各位朋友, 大家平安, 大家好, 大家出頭天！咱ài追求出頭天！

民主改革是一條lò-lò長ê路, 雖然坎坷, 總是這是咱ê宿命, 無行袂煞得, 無行無前途, 無行袂出名.

昨暗去台北參加李前總統ê宴會, 看著李總統已經92歲猶閣teh煩惱台灣, 為台灣拍拚, 實在真佩服, mā真m̄甘. 昨暗我整理寡想法, tī-chia 提供大家參考. 

「第二次民主改革」, 照我看, 有4項代誌上要緊： 憲政問題, 司法改革, 教育議題 kap建立公民社會.

1) 憲政問題

咱這馬ê憲法, 體制亂操操, 總統有權無責任, 民意代表無代表民意, 政府官員無擔當,無做代誌,  國家政務袂當順利推sak, 人民有想法mā無路用, m̄是總統制, mā m̄是內閣制, 用台灣話講, 就是烏魯木製.  照道理講, tī民主國家, 人民是國家ê頭家/主人, 應該決定國家ê政策, 方向kap未來; 政府官員是人民ê薪勞 (歹勢講奴才lah), 責任是執刑人民ê意志kap理想. 民意代表負責替人民監督政府官員執行政務.  但是chit-má 續顛倒péng, 政府是頭家, 決定一切, 民意代表受政黨控制, 無聲無說, 人民續變做是順民kap奴才, kan-na會當gōng-gōng á投票, 投票了後就消失lah! 這絕對m̄是民主, 根本to是 ”政府替人民做主”! 有「中國特色」ê民主! 莫怪早前老輩lóng講民「主」差一點仔, 就是民「王」!

2) 司法改革

照咱過去幾十年ê經驗來看, 理想ê「司法獨立」無可能真緊會完成! 過去是政治迫害, 這馬變做司法迫害. 法院是國民黨開--ê, 法律是國民黨寫--ê, 法官是國民黨訓練--ê! 這馬雖罔有寡進步, 總是中國國民黨繼續利用司法, kā中國國民黨以外ê政治人物亂使起訴, 利用自由心證來烏白判刑! 這款司法迫害ê政治效果, 比早前ê政治迫害koh-khah恐怖, mā koh-khah有效!

司法審判權是國家主權上koân級ê表現, 若會當交hō͘人民來決定, 表示國家對人民有信心, 按呢才是真正ê民主! 所以, 咱應該採用歐美ê陪審團制度, kā司法審判權交hō͘人民，有罪無罪根據一般人民ê生活經驗來斷定, 法官負責需要專業知識ê徒刑輕重判決. 咱lóng知影法律裁判最困難的工作，就是裁判者本身ê生活經驗. 生活經驗愈濟, 做出來ê裁判愈接近國民ê社會文化認知, 愈hō͘國民認同kap接受. 就是大家感覺有公平, 有正義. Tī美國, 早期移民時期受著英國政治打壓ê經驗，以及後來對種族問題ê困擾, 特別建立公正的陪審團制度。陪審員ê揀選不分學歷、年齡、職業，陪審團制度ê判決採用共識決, m̄是多數決, m̄免煩惱無仝黨派ê問題. 按呢, 會當減少「恐龍法官」違反生活經驗kap一般常識ê判決, mā除防政治冤獄ê可能. Thang算是”一兼二顧”. 所以講, 司法審判權交還人民是台灣民主化ê煞尾站. 但是, 中國國民黨定著反對到底, in當然mā知影時代已經無仝, 無改袂用--得, 所以發明一个不三不四ê觀審制度, hō͘人民會使得khiā tī法庭內面a恬恬á看, 袂使做啥物決定. 簡單講就是m̄相信台灣人民有才調做正確判斷!  咱回想往過teh討論總統交hō͘人民直接來選, 中國國民黨ê頭人mā是一直反對, 講若是總統直接民選, 台灣定著會大亂, 意思是台灣人水準猶真無夠額, 無資格享受這款民權. 結局leh? 全世界佗一个國家無kā咱o-ló?   

3) 教育議題：就是「教育台灣化」

教育是上俗, 上緊, koh上有效ê國防投資kap社會進步ê基礎.

「台灣囡仔讀台灣冊」, 是阮台灣南社朋友20外年來一直teh主張kap追求ê目標. 因為殖民教育, 台灣本土語言hō͘人看phìⁿ-siùⁿ, 致使台灣人失去家己ê信心kap認同! 事實是, 台灣有chiok-chē (足濟)gâu人, tī 藝術(黃土水, 陳澄波, 謝理法, ), 文學(楊逵, 賴和, 呂赫若, 東方白, 李喬), 音樂(郭芝苑, 簫泰然, ), 醫學(蔣渭水, 杜聰明, 王敏昌),  科學(統計學, 陳文成), 其他koh有像林茂生, 湯德章, 林秋梧, 等相當傑出ê人物, 可惜台灣大人囡仔lóng m̄-bat, 大家熟似---ê顛倒是張大千, 余光忠, 佛光山ê星雲, 中台禪寺ê惟覺老和尚,,,,欣羡ê對象lóng無台灣人! 按呢自然台灣認同有困難! 最近大家一直講咱ài有信心面對中國. 信心對tó來？ 了解咱台灣有真濟傑出人物, 有友善人民, 有優良文化,,,,,按呢才有可能!

若是台灣囡仔有機會讀台灣冊, 就會jīn-bat 台灣, 了解台灣, 知影台灣ê優點kap缺點, 按呢才有可能來寶惜台灣, 改善台灣, hō͘台灣進步. 按呢咱才有向望kap未來.

咱斡頭來看, 1997開始有認識台灣ê課, 1999年開始有母語必選課, 雖罔課m̄是真濟, m̄-kú 效果已經有看--著! 後--來台灣認同會穩定增加到這馬chiah濟, 大部分lóng是按呢來--ê. 這lóng是李總統ê功勞, 咱ài kā拍kuipho̍k-á o-ló. 但是, mā猶是真無夠額, 因為咱本土ê政黨無夠用心!  所以這馬台灣囡仔對台灣ê了解猶原是真有限！建議民進黨縣市長應該koh-khah認真推sak「教育台灣化」ê事工. 民進黨本身mā應該tī「婦女部」「國際部」「文化部」等以外koh單獨成立「教育部」, 負責制定「教育台灣化」ê政策, 按呢台灣才有向望. 若是kan-na一直teh舞選舉, 永遠mā免siàu想beh出頭天!

「教育台灣化」、「台灣囡仔讀台灣冊」不管是歷史、地理、文學、語言lóng應該按呢. 總講一句, 提倡「台灣學」Taiwanology救台灣lah.

4) 建立公民社會

長期ê外來統治、外國教育(China&Japan)kap政治高壓hō͘台灣人變做無聲音ê順民kap無頭殼ê gōng人. M̄才會「台灣人, 好拐, 歹教」咱應該教育人民成做會曉獨立思考, 有才調判斷, 有想法koh敢講出聲, beh做代誌koh肯負責ê現代公民, 親像這擺日頭花運動ê學生囡仔. 按呢後擺不管啥物政黨執政, lóng無可能koh烏白來, 按呢, 根本的來改變台灣社會, 永遠, 久長hō͘台灣人thang安居樂業!

敬請大家指教.

感謝. Ló͘-la̍t. An-chu-se. Malimali. Masalu.